Deputeti shqiptar në parlamentin e Suedisë, Adnan Dibrani, ka marrë titullin “hero” në Malin e Zi, pasi shpëtoi nga mbytja një fëmijë 2 muajsh dje në Lumin Moraça.
Foshnja ishte me një grua, e cila për fat të keq ishte mbytur.
Vetë deputeti në një intervistë në Klan Kosova ka rrëfyer ngjarjen, dhe tha se po kalonte rastësisht në atë rrugë kur kishte parë foshnjën mbi ujë dhe pa u menduar nëse është kukull apo bebe nxitoi ta ndihmonte.
“Isha në Mal të Zi që t’i shikoja zgjedhjet presidenciale dhe dje ishim me një irlandez, që është kryesues i delegacionit, dolëm që të ecnim. Kur mbërritëm tek lumi, nuk ia dinim emrin. U ndalem tek ura që ta gjejmë emrin dhe kur shikova poshtë pashë një grua me kokë poshtë në ujë dhe nuk dija se çfarë ka ndodhur”, është shprehur Dibrani.
Më tej ai tha se në një moment iu duke se gruaja lëshoi diçka, për të cilën tha se “nga lart u duk si një kukull, e në atë moment vendosëm që të vrapojmë poshtë e të shikojmë se a është foshnje apo kukull”.
“Dy persona mbërrtën para meje, e nxorën foshnjën nga uji. Kur mbërrita e kam kapë foshnjën dhe fillova t’i jap ndihmën e parë. Pas një kohe, foshnja u bë e gjallë. Kam vrapuar deri në rrugë që ta presim ambulancën”, tha Dibrani.
Ai tha se sipas informacioneve që ka, foshnja është mirë po nuk dihet nëse do të ketë ndonjë komplikim shëndetësor më tutje.
Deputeti ishte në Podgoricë si pjesë e misionit vëzhgues të Asamblesë Parlamentare të Këshillit të Evropës ditën e zgjedhjeve presidenciale në Mal të Zi./Opinion.al
