TIRANË- Prokuroria e Përgjithshme i ka mbyllur më në fund hetimet për deputetin Mark Frroku dhe e dërgon atë për gjykim me plot 4 akuza, njëra prej tyre vrasje. Me këto akuza, Frroku rrezikon ta kalojë jetën në burg. Gjithsesi është gjykata ajo që vendos.
Përmes një njoftimi zyrtar Prokuroria e Përgjithshme ka bërë të ditura akuzat që ngrihen për Mark Frrokun i cili mbahet në paraburgim që prej pranverës së këtij viti.
Akuza 1: “Vrasjes me paramendim, e kryer në bashkëpunim”.
Bëhet fjalë për vrasjen e vitit 1999 në Belgjikë, kur pas një përleshje ndërmjet Frroku dhe disa personave ka mbetur i vdekur shqiptari Aleksandër Kurti. “Në bazë të veprimeve proceduriale hetimore, rezulton se i pandehuri Frroku dhe 3 bashkëpunëtorët e tij kanë vrarë shtetasin Kurti, për shkak të përplasjeve në aktivitetin e paligjshëm të shfrytëzimit të prostitucionit”, deklaron prokuroria.
Akuza 2: “Mosdeklarimi, fshehja ose deklarimi i rremë i pasurive”,
Bazuar në kallëzimin penal të Inspektoratit të Lartë të Deklarimit dhe Kontrollit të Pasurive e Konfliktit të Interesave (ILDKPKI), shtetasi Mark Frroku akuzohet se nuk justifikon me burime të ligjshme pasurinë në vlerë mbi 2 milion dollarë.
Akuza 3: “Pastrim i produkteve të veprës penale ose veprimtarisë kriminale”.
Nga hetimet ka rezultuar se shtetasi Mark Frroku është dënuar në vitin 2002 nga autoritetet e Hollandës me 3 vjet burgim, për veprën penale të “trafikimit të lëndëve narkotike”. Bazuar ne te dhënat hetimore ka rezultuar se, nga viti 1998 deri ne vitin 2007 shtetasi Mark Frroku ka krijuar pasur ne vlerën 73.863.722 lekë. Lidhur me kete pasuri prej 73.863.722 lekë ka rezultuar se nuk justifikohet nga burime financiare te njohura. Ne vijim nga viti 2008 deri ne vitin 2013 shtetasi Mark Frroku ka krijuar pasuri ne vlerën 135.763.496 lekë e cila gjithashtu nuk justifikohet nga burime te njohura financiare. Për sa më sipër nga viti 1998, kohë kur shtetasi Mark Frroku ka kerkuar azil politik ne Belgjike dhe deri ne vitin 2013 kur ka bere deklarim pranë ILDKPKI para fillimit te detyrës si Deputet i Kuvendit te Shqiperisë ka rezultuar se ka krijuar një pasuri prej 209.627.218 lekë me burime te panjohura.
Akuza 4: “Ndërtim i paligjshëm”
Bëhet fjalë për ndërtesën që njihet me emrin “hotel Pensioni” në rrugën e Durrësit, pranë Bllokut të Ambasadave. Sipas prokurorisë Frroku ka ndërtuar një kap pa leje në hotelin. “Nga hetimi ka rezultuar se kjo shtese anësore nuk ka qenë e ndërtuar në kohën e blerjes së këtij objekti , por është ndërtuar pas blerjes së tij nga shtetasit Mark Frroku, i cili ka aplikuar për legalizimin e këtij ndërtimi pa leje të organeve kompetente në zyrat e ALUINZI-t Tiranë në datën 24.11.2014”, bën të ditur prokuroria.
