Deputeti i PD-së, Dashnor Sula, ka shkuar në seancën plenare të kësaj të enjteje me bukë me vete.
Ai është ndalur dhe ka dhënë një deklaratë për mediat ku ka thënë se paraqitja e tij vjen si shenje proteste për rritjen e ulët të pensioneve.
Sula tha se me rritjen prej 50 lekësh të reja në ditë të pensioneve nuk blihet as një gjysmë buke. Sipas tij, është një luks i shfrenuar për Gjykatën Kushtetuese që kryetarja të marrë 8 mln, dhe pensionistëve iu shtohet 50 lekë në ditë.
“Sot një bukë masive kushton 1200 lekë të vjetra. Rritja është as sa një gjysmë buke. Bukë për 30 ditë i thonë 36 mijë lekë, kur pensioni është rritur 15 mijë lekë.
Luks i shfrenuar për Gjykatën Kushtetuese, e cila thuajse është totalisht në uzurpimin e qeverisë. Kryetarja do marrë 8 mln, pensionistëve iu shtohet 500 lekë në ditë.
Do doja të protestoja për gjendjen në të cilën ndodhen prindërit dhe gjyshërit tuaj. Polarizimi i shoqërisë i tejskajshëm.
Është e turpshme, duke nisur nga unë, deputet i këtij parlamenti që kam atë rrogë. Fshatarët, punëtorët nuk mbushin barkun me bukë. Sot në parlament do t’i ngremë këto shqetësime”, tha Sula.
