Tashmë është bërë traditë që politikanë të huaj vijnë në çadrën e lirisë në mbështetje të Bashës. Sot ishte deputeti austriak, Michael Hammer. Duke folur nga çadra ai tha se elementi më i rëndësishëm i një demokracie moderne janë zgjedhjet e lira.
“ Nuk është një e drejtë e qytetarëve të kenë zgjedhje të lira dhe të ndershme, por është detyrim për ta që zgjedhjet të zhvillohen në mënyrë të lirë dhe të ndershme”, u shpreh Hammer.
Sipas tij, besimi për qeverinë aktuale nuk është i madh, ndaj është momenti për zgjedhje të lira dhe qeveri teknike.
“Eshtë shumë e rëndësishme të bëhet reforma zgjedhore, si dhe që procesi i zgjedhjes së gjyqtarëve dhe prokurorëve të bëhet në mënyrë objektive.
Unë kam folur shumë shpesh me qeverinë duke i kërkuar asaj që lufta kundër drogës dhe korrupsionit të jetë më e fuqishme. Kanabisi juaj nuk është problem vetëm për Shqipërinë, por për gjithë Europën, por është momenti që ta mposhtim atë.
Unë dhe partia që përfaqësoj do të jemi një mbështetje e madhe dhe pak më vonë do të ketë një tjetër përfaqësues nga Austria në mbështetje të Shqipërisë. Nëse vërtet në Shqipëri do të ketë këtë herë zgjedhje të lira, atëherë patjetër që do të ketë një qeveri të drejtuar nga Lulzim Basha”, u shpreh deputeti austriak.
