Partia Demokratike ka dënuar edhe njëherë nëpërmjet deputetit të saj Enkelejd Alibeaj, procesin Vettingut si të kapur nga qeveria Rama
Alibeaj e cilësoi këtë proces si si një farsë të orkestruar nga Edi Rama, me qëllim kapjen e sistemit të drejtësisë, duke e ilustruar me shembullin e një gjyqtari të papërshtatshëm që sipas tij kaloi Vettingun me urdhër të Ramës.
“Meqë qeveria hesht për vendimet arbitrare të komisionit të Vettingut, Partia Demokratike po sjell sot një denoncim, se si ky organ po minon procesin, për të vënë drejtësinë në duart e Edi Ramës. Ilir Toska, Gjyqtar i Gjykatës së Apelit në Tiranë, kaloi vettingun në muajin qershor, ndonëse DSIK kishte dorëzuar pranë Komisionit të Pavarur të Kualifikimit një raport, që e cilësonte si të papërshtatshëm këtë gjyqtar, për të vijuar karrierën në drejtësi. Sipas raportit të DSIK, Toska ka marrë para në prani të një zyrtari të Ministrisë së Brendshme, për të mos dhënë një masë disiplinore ndaj një gjyqtari. Gjithsesi, Ilir Toska e kaloi me sukses Vettingun, pasi është kandidat i Edi Ramës, për Këshillin e Lartë Gjyqësor”, tha Alibeaj.
Gjyqtari Toska kaloi në sitën e Vettingut në muajin qershor.
Gjatë seancës dëgjimore, relatori i KPK-së evidentoi shkresën e DSIK, që e cilësonte gjyqtarin si të papërshtatshëm, por tha se raporti ishte i paprovuar, ndaj edhe nuk e mori parasysh gjatë procesit.
Ky ishte edhe rasti i parë kur Komisioni i Pavarur i Kualifikimit, nuk mori për bazë një raport të ardhur nga Drejtoria e Sigurimit të Informacioneve të Klasifikuara (DSIK).
