Dhjetra deputetë nga Moska dhe Shën Petersburgu i kanë bërë thirrje presidentit Vladimir Putin të japë dorëheqjen me anë të një letre të hapur të publikuar këtë të hënë.
Thirrja për dorëheqjen e presidentit rus vjen mes pretendimeve për manipulim votash në zgjedhjet lokale dhe rajonale të kësaj fundjave, si dhe një përparim masiv nga forcat e Kievit që shënuan pengesën më të madhe ende për pushtimin e Ukrainës nga Moska.
Nënshkruesit e letrës së hapur, e kanë vënë jetën në rrezik me këtë veprim, pasi sipas ligjeve të miratuara menjëherë pasi Rusia pushtoi Ukrainën, nuk lejon kundërshtimin e luftës.
“Veprimet e Presidentit Putin janë të dëmshme për të ardhmen e Rusisë dhe qytetarëve të saj”, thuhet në peticionin e shpërndarë në Twitter nga Ksenia Torstrem, një deputete për distriktin Semyonovsky të Shën Petersburgut.
“Kërkojmë dorëheqjen e Vladimir Putin nga posti i Presidentit të Federatës Ruse”, vijon deklarata e nënshkruar fillimisht nga 19 deputetë. Sipas Torstrem, 84 persona të tjerë nënshkruan peticionin të hënën.
“Janë marrë edhe 84 nënshkrime të tjera, tani do t’i kontrollojmë”, ka shkruar Torstrem.
Mbikëqyrësi i pavarur i zgjedhjeve Golos raportoi dhjetëra raste të manipulimit të votave, frikësimit, blerjes së votave dhe keqregjistrimit të votave pasi kandidatët pro-Kremlinit dolën në terren në zgjedhjet lokale dhe rajonale të Rusisë.
Ndërkohë, kundërofensiva ukrainase në rajonin e saj verilindor të Kharkivit pa që forcat e Kievit të rimarrin rreth 3,000 kilometra katrorë tokë të pushtuar më parë nga Moska. Thirrjet nga deputetët që Putini të tërhiqej fillimisht dolën javën e kaluar pasi Dmitry Palyuga, një deputet nga distrikti Smolninskoye i Shën Petersburgut, i bëri thirrje Dumës së Shtetit të gjykonte presidentin me akuzat për tradhti për pushtimin e tij në Ukrainë.
Palyuga u thirr në rajonin e policisë me akuza të mundshme për “diskreditim” të ushtrisë ruse, por më vonë u la i lirë./Opinion.al
