Përpara se seanca e sotme plenare të niste sipas rendit të ditës, deputeti Kujtim Gjuzi tha nga foltorja se është kërcënuar në seancën e kaluar.
“Çfarë Kodi kisha shkelur herën tjetër? Në orën 14:19 minuta më ka ardhur mesazh kërcënues për veshjen” u shpreh Gjuzi.
Kryetari i Kuvendit, Gramoz Ruçi i ka kërkuar deputetit Gjuzi të ulet në vendin e tij dhe i ka kujtuar gjithashtu të mos parkojë makinën në derën e parlamentit.
“Unë nuk të kam kërcënuar, por të kërkova të zbatosh etikën dhe të mos ndalosh autoshkolla te dera e parlamentit“.
Një tjetër denoncim për kërcënim ka bërë edhe deputetja Hajdari. Ajo ka kërkuar të sigurohen ambientet e Kuvendit pasi sipas saj është kërcënuar në zyrën e saj.
“Para pak ditësh u dërgova një shkresë për një kërkesë që të sigurohen ambientet e Kuvendit dhe të Kryesisë. Nuk mund të ndodhë sot që deputetët të kërcënohen. E papranueshme që një femër të kërcënohet. Kam pasur raste që në zyrën time më kanë ardhur dhe më kanë kërcënuar. Ka ikur ajo kohë. Ju lutem, merrni masat para se të kemi ndonjë viktimë. Masat të jenë në kryesinë e kuvendit, asnjë deputet nuk duhet të hyjë pa u kontrolluar, të marrë të tjerë dhe të shantazhojë. Ju lutëm të merren masat” deklaroi Rudina Hajdari.
Ruçi iu përgjigj deputetes se shkresa e saj është marrë dhe problematika i është adresuar ministrit të Brendshëm.
“Zonja Hajdari, e kam marrë shkresën tuaj, punonjësit e sigurimit do të bëjnë detyrën. Ndërkohë që e kam përcjellë shkresën dhe sot mund t’i ketë vajtur ministrit të Brendshëm, që pas kësaj të merren masat për të gjitha shqetësimet që keni ngritur në shkresën tuaj” tha Ruçi. /Opinion.al
