Gjyqtari i Fierit, Vladimir Cjapi dhe familjarët e tij, janë marrë në mbrojtje, pas denoncimit se ishte kanosur nga shtetasi Arben Isufaj, i njohur si Ben Qimja.
Përmes një njoftimi zyrtar, Gjykata e Fierit ka dënuar rëndë aktin dhe ka kërkuar që të zbardhet ngjarja e të nxirren para përgjegjësisë ligjore personat e përfshirë.
”Duke marrë shkas nga informacioni paraprak i Policisë së Shtetit në ditën e sotme lidhur me sigurinë e jetës së magjistratit z. Vladimir Cjapi, me funksion gjyqtar në Gjykatën e Shkallës së Parë të Juridiksionit të Përgjithshëm Fier, Gjykata e Shkallës së Parë të Juridiksionit të Përgjithshëm Fier përcjell me shqetësim të thellë këto akte që cenojnë rëndë jetën dhe sigurinë e gjyqtarit, familjes së tij, trupës gjyqësore dhe përbëjnë kërcënim serioz për gjithë sistemin e drejtësisë dhe shoqërinë shqiptare në tërësi.
Me kërkesë të Zëvendëskryetarit të Gjykatës së Shkallës së Parë të Juridiksionit të Përgjithshëm Fier, z. Noel Veizi, Këshilli për Mbrojtjen e Magjistratëve ka miratuar kërkesën për mbrojtjen të posaçme të gjyqtarit z. Vladimir Cjapi dhe familjarëve të tij.
Shprehim bindjen se i gjithë opinion publik ndodhet sot përkrah gjyqtarit z. Vladimir Cjapi, familjes së tij dhe Gjykatës së Shkallës së Parë të Juridiksionit të Përgjithshëm Fier, si dhe dënojnë rëndë këtë akt.
Gjykata e Shkallës së Parë të Juridiksionit të Përgjithshëm Fier denon aktin kriminal dhe i kërkon organit të akuzës hetimin, zbardhjen e ngjarjes dhe të nxjerrë para përgjegjësisë ligjore personat e përfshirë.
Gjykata e Shkallës së Parë të Juridiksionit të Përgjithshëm Fier i shpreh mbështetjen të gjithë gjyqtarëve të sistemit gjyqësor për të garantuar sigurinë e tyre, në mënyrë që të ushtrojnë detyrën pa frikën e kërcënimeve, pasi respektimi i funksionit dhe dinjitetit të tyre, është parakusht për një proces të rregullt ligjor, për një sistem drejtësie efektiv dhe efikas, por edhe për funksionimin normal të shtetit të së drejtës”, thuhet në njoftim.
