Rasti i Ndriçim Hajdarmatajt që denoncoi ministrin Beqaj në emisionin “Stop” për pushimin nga puna për motive politike ka nxitur edhe shumë qytetarë të tjerë të publikojnë rastet e tyre.
Mbrëmjen e djeshme teksa transmetohej emisioni “Opinion” me fokus përgjimet dhe shkarkimet politike në administratë, një mësuese ka denoncuar rastin e saj.
Majlinda Panozaqi, është diplomuar për mësuese Fizike për shkollat e mesme në Fakultetin e Shkencave të Natyrës në Tiranë në vitin 1985 dhe është pushuar nga puna në vitin 2014, pas 29 vitesh në arsim.
Për portalin “Opinion.al” ajo thotë se “nga 29 vite pune në total, 23 i kisha në gjimnaznin “Halim Xhelo” në Vlore. Nuk më kanë dhënë asnjë motivacion për ndërprerjen e marrëdhënieve të punës dhe aktualisht jam në proces gjyqësor”.
Duke përshkruar ditën e fundit të punës në këtë gjimnaz, ajo shkruan: “Një mëngjes kur po bëhesha gati të hyja në oren e parë të mësimit, drejtuesja e shkollës ndërron orarin mësimor dhe thotë që klasa jote nuk ka Fizikë por ka Fiskulturë. Kaq, asnjë shpjegim tjeter nuk kam marrë. Pra më kishin hequr orët e mësimit”.
Më tej, znj. Panozaqi thotë se është ankuar në të gjitha instancat , në Drejtorinë Arsimore Vlorë e deri tek Ministrja e Arsimit, Nikolla, por nuk ka marrë asnjë përgjigje, duke nënkuptuar se ishin në mbështetje të drejtoreshës së shkollës.
Ajo mendon se shkarkimi nga puna si mësuese ka motiv politik, pasi më herët në periudhën (shtator 2009 – shkurt 2014) ka qenë drejtuese e kësaj shkolle. Ajo thotë se ka dhënë dorëheqje nga posti drejtues dhe ka vazhduar në profilin e saj (Fizikë) deri në momentin që mori urdhërin e shkarkimit.
Tashmë mësuesja e shkarkuar nga puna thotë se ka fituar gjyqin dhe shteti i detyrohet rreth 1 000 000 lekë (të reja). Por këto para nuk i ka marrë ende pasi çështja është në Apel. “Ka 1 vit e gjysëm që presim gjykimin e shkallës së dytë. Dhe siç thotë një shprehje gjykimi i vonuar është drejtesi e munguar…”.
/Opinion.al
