Mërgim Brahimi prej kohësh është divorcuar nga kombëtarja Shqiptare dhe pas nje periudhe aktivizimi me ekipin U-21 të Zvicrës ka preferuar të luajë me ekipin përfaqësues të Kosovës.
Brahimi në një intervistë për Telegrafi.com rrëfen arsyet e largimit nga kombëtarja e Shqipërisë duke akuzuar rëndë trajnerin e ekipin U-21, Redi Jupi dhe institucionin e FSHF-së.
“Ishte viti 2011 kur FSHF organizoi një kamp në Zvicër dhe shkova që të provohem që t’i bind trajnerët për të luajtur me Kombëtaren shqiptare edhe pse Zvicra më kërkonte me ngulm por unë e doja vetëm Shqipërinë. Menjëherë Redi Jupi më ka thënë mua dhe Imran Bunjakut që nuk kemi nevojë të stërvitemi pasi na kanë përcjellë dhe jemi pjesë e Shqipërisë”, shprehet fillimisht Brahimi për Telegrafin.
“Të luaja për Shqipërinë ka qenë ëndërr e imja dhe mu bë realitet. Kam luajtur për Shqipërinë U-21 dhe një ndeshje ndaj Iranit me Kombëtaren A. Mezi prisja të më vinte ftesa për të shkuar me qejfin dhe dëshirën më të madhe për të luajtur për vendin tim”.
“Para ndeshjes me Rusinë më erdhi ftesa nga Redi Jupi që të luajmë në Moskë dhe përgjigja ime ishte se duhet të fluturoja një ditë më vonë, pasi kishim ndeshje me klubin tim Grasshopper dhe nuk më lejonin. Jupi më tha se atëherë do të duhet ta nxjerrë me para të mia biletën e aeroplanit dhe kjo gjë nuk ishte në rregull dhe nuk pranova”, vijon Brahimi.
“Pas insistimit tim që FSHF të paguaj biletën ashtu ndodhi dhe shkova në Rusi. Në Moskë Jupi më kërkoi paratë e biletës që ka paguar FSHF dhe natyrisht që nuk ia dhashë sepse është detyrë e FSHF-së të paguaj biletat e lojtarëve. Luajtëm ndeshje dhe arritëm një barazim të madh përballë Rusisë 0-0. Kur po kthehesha për në Zvicër ishim katër futbollistë nga Zvicra, ndërsa tre prej tyre fluturuan mua më thanë se nuk kam biletë kthyese për tu rikthyer”.
“Kam telefonuar pa reshtur Redi Jupin dhe të gjithë në FSHF por askush nuk mu përgjigj. Më keqtrajtuan, më tradhtuan, më lanë të vetëm në një shtet si Rusia dhe u desh të qëndroj një natë në hotel për ta nxjerrë biletën të nesërmen dhe të fluturoj për në Zvicër”, -tregon Brahimi, duke lëshuar akuza të rënda për Redi Jupin.
“Me të ardhur në Zvicër kam thënë se nuk do të kthehem më në Shqipëri deri sa të jetë ai njeri aty. Ai më kërcënoi edhe me jetë duke thënë se do të më varte në shesh të Tiranës por nuk do t’i realizohet asnjëherë ajo dëshirë. Jupi nuk mund të bëhet me shqiptar se unë. Një person si ai, që e dëmton Shqipërinë duke i larguar talentet me sjelljet e tij të vrazhda, nuk është shqiptar dhe nuk ia do të mirën vendit të tij”,- ka deklaruar ndër të tjera Brahimi për Telegrafin, ndërkohë që deklaratat e tij me siguri do të hapin debate të mëdha në Shqipëri.
