Ministri i Brendshëm Taulant Balla ka reaguar në lidhje me një denoncim të bërë nga gazetari Blendi Fevziu, i cili ka shpërndarë në rrjetet sociale pamje nga gjendja pranë rrugës në Llogara 2 ditë më parë.
Balla thotë se hedhja e mbeturinave si në pamjet e bëra publike në Parkun e Llogarasë është një akt barbar kundër mjedisit dhe turizmit.
Ai bëri me dije se Policia e Shtetit ka proceduar penalisht 3 persona, konkretisht, administrator të njësive tregtare në zonë.
“Policia e Shtetit po kryen detyrat e veta për ta mbrojtur mjedisin. Hedhja e mbetjeve si në videon më poshtë në Parkun e Llogarasë është një akt barbar kundër mjedisit dhe turizmit.
Policia e Shtetit ka proceduar penalisht tre persona, administratorë të njësive tregtare të zonë. Ju lutem na ndihmoni t’i denoncojmë këto raste dhe t’i tregojmë shkelësve se penalitetet janë të rënda”, shkruan Balla.
