Ish-Kryebashkiaku i Mallakastrës, Qerim Ismailaj, është shpallur fajtor për falsifikim dokumentesh. Mësohet se Gjykata ka dënuar Ismailaj me 6 muaj burg, por në vendimin e GJKKO thuhet se dënimi me 6 muaj burg është konvertuar në 40 orë punë në interes të komunitetit dhe të mbajë kontakte të rregullta me shërbimin e provës.
Sipas SPAK, Ismailaj nuk ka shënuar në formularin e vitit 2019, në cilësinë e kandidatit për kreun e bashkisë se kishte qenë i dënuar në Greqi.
“Në aplikim të nenit 63 të Kodit Penal, pezullimin e ekzekutimit të dënimit me burgim për të pandehurin Qerim Ismailaj dhe detyrimin për kryerjen e një pune në interes publik, pa shpërblim, për një kohë prej 40 (dyzet) orësh, e cila do të përmbushet brenda afatit prej 6 muajsh, me kusht që gjatë kësaj kohe të mbajë kontakte të rregullta me Shërbimin e Provës”, thuhet në vendimin e gjykatës.
Kryebashkiaku i Mallakastrës u denoncua nga Partia Demokratike në kuadër të ligjit të Dekriminalizimit.
