Drejtoresha e Komanduar e Bankës Botërore në Shqipëri Evis Sulko u tha se efekti i tërmetit është sa 7.5% e Prodhimit të Brendshëm Bruto.
Gjatë konferencës për raportin përfundimtar të vlerësimit të nevojave pas tërmetit, ajo tha se si pasojë e tërmetit është ulur ritmi i rritjes ekonomike.
“Efekt i tërmetit të 26 nëntorit 7.5% të PBB. Ritmi i rritjes ekonomike në fund të vitit të kaluar është ulur, kjo trajektore është parashikuar edhe për këtë vit, rritja 3.2% nga 3.5% që ishte parashikimi. Pasuritë e paluajtshme dhe turizmi janë goditur më shumë. Procesi i rindërtimit pritet të sjellë rritje më të shpejtë të sektorit të ndërtimit” tha ajo.
Sipas raportit të prezantuar sot, dëmet më të madha financiare janë shkaktuar në sektorin e strehimit, më pas infrastruktura dhe arsimi. 663 milionë euro janë dëmet në sektorin e strehimit. Efektet më të mëdha kanë qenë në banesat private. Nga tërmeti janë dëmtuar edhe 111 monumente.
Ministri i Bujqësisë Blendi Çuçi tha se rimëkëmbja do të kushtojë më shumë se fatura e dëmeve të tërmetit.
Lexo edhe: Sa na kushtoi tërmeti? Ministri Çuçi zbulon raportin përfundimtar
“Nevojat për rindërtimin janë 1.07 miliardë euro. Pra nevojat për procesin e rindërtimit janë 85 mln euro më shumë sesa dëmet”.
I pranishëm në konferencë ishte dhe Koordinatori i Përhershëm i OKB në Shqipëri, Brian J. Ëilliams. Ai i bëri apel autoriteteve vendore që të jenë të përgatitura për rastet e fatkeqësive natyrore.
“Është e rëndësishme që të ndërtohet më mirë, të shikohet se cilat janë objektivat që kur të bëhet rindërtimi të jetë mobilizimi i duhur. Të merren parasysh edhe çështjet mjedisore, por edhe që çështjet gjinore. Mos harrojmë që në qendër të jenë njerëzit komunitetet. Agjencitë dhe aktet nënligjore duhet të jenë ekzistuese. Ulja e rrezikut nga fatkeqësitë kërkon që të gjitha agjencitë të bashkëpunojnë, ministritë e linjës, që të mendojnë një rezervë, të jenë të përgatitur. Por edhe zyrat e qeverisjes vendore duhet të kenë burimet e tyre” tha ai. /Opinion.al
