Ministri i Rindërtimit, Arben Ahmetaj dhe ministri turk i Mjedisit dhe Urbanizimit, Murat Kurum, mbajtën sot një konferencë të përbashkët për shtyp ku dhanë detaje lidhur me ndërtimin e 500 shtëpive të shkatërruara nga tërmeti i 26 nëntorit.
Ministri Ahmetaj u shpreh se puna për rindërtimin e 500 banesave ka filluar. Ai theksoi se deri në fund të vitit të gjitha familjet në fshat do të jenë në shtëpitë e reja, ndërsa në pranverën e 2021 do të nisë akomodimi në lagjet e reja.
“Puna për rindërtimin ka filluar, 500 banesa për ata që kanë humbur shtëpitë, me ambiente komerciale, ndërtesë për bashkinë dhe shkollën. Është një konceptim urbanistik dhe teknologjik që do i mbijetojë kohës dhe do jetë një risi e cila që mund të kthehet në model për projekte të tjera.
Procesi i rindërtimit po vijon me hapa të shpejta , projekti me Turqinë mendohet të përfundojë rreth muajit korrik, sigurisht kjo na vendos në presion të nevojës së qytetarëve për të ndjek afatet.
Siç e kam theksuar prezantuam një sërë programesh në VKM në favor të Rindërtimit të banesave. Në favor të kthimit në banesa të ta pastrehëve” tha Ahmetaj.
Ministri turk bëri të ditur se nesër do të nënshkruajë Protokollin e bashkëpunimit në prani të kryeministrit Edi Rama. Ai theksoi se nëse puna për rindërtimin e 500 shtëpive do të nisë në fund të janarit, atëherë familjet do t’i kenë çelësat në dorë brenda 6 muajve.
“E konsiderojmë si një detyrë vëllazërie. Që në orët e para të tragjedisë kontaktuam me ambasadën turke këtu dhe u përpoqëm që të ishim afër jush. Kemi sjellë 1500 cadra të tjera sot në mëngjes si dhe ekipe vlerësimi për dëmet nga tërmeti. Nesër në prani dhe të kryeministrit Rama do të nënshkruajmë një Protokoll bashkëpunimi për dëmet pasi kemi përshpejtuar procesin e vlerësimit të dëmeve nga tërmeti i 26 nëntorit.. Do ta realizojmë sa më shpejt projektin e rindërtimit në Shqipëri, pasi kemi realizuar edhe në vende të tjera. Brenda këtyre dy ditëve të vizitës sime do të zhvillojmë diskutime me qytetarët e prekur nga tërmeti. Kurse 500 banesat e reja të përshtatura me kulturën tuaj të jetesës duam që brenda 6 muajve të përfundojë projekti, dhe t’i dorëzohen vëllezërve tanë shqiptarë të prekur nga tërmeti. “, tha ministri turk Kurum. / Opinion.al
