Shumë e kanë cilësuar si shkrepja e shekullit. Një imazh i shndërruar në simbol në gjithë botën. Është vajza afgane e Steve McCurry dhe tashmë është nxjerrë në shitje në sajtin e specializuar ArtNet me një çmim fillestar prej 15 mijë dollarësh. Imazhi i fotografit amerikan u publikua në kopertinën e ‘National Geographic’ në qershor të vitit 1985 dhe u bë një simbol i vërtetë i luftërave që përfshinë Afganistanin gjatë viteve ‘80.
Subjekti i fotos është Sharbat Gula, në atë kohë një jetime 10-vjeçare që gjendej në kampin e refugjatëve në Peshawar, Pakistan. Interesante është edhe historia që e bëri fotografin të rikthehej në gjurmët e vajzës 17 vjet pas asaj shkrepjeje. Pas një kërkimi të gjatë, McCurry arriti ta rigjente vajzën në një rajon malor të Afganistanit. Tashmë 30-vjeçare, Sharbat ishte e martuar me tre fëmijë.
“Lëkura e saj është e lodhur dhe e mbushur me rrudha, por ajo është njësoj aq e jashtëzakonshme sa ç’ishte edhe shumë vite të shkuara”, tha McCurry menjëherë pasi kishte mundur ta takonte dhe t’i rrëmbente një tjetër foto. /gazeta shqip/
