Edmond Themelko, kryetari i Bashkisë Pustec, i cili u cilësua një ditë më parë nga mediat si “gënjeshtari i parë” i formularëve të vetëdeklarimit, ka reaguar duke u shprehur se veprimet hetimore proceduriale ndaj tij për çështjen “Titaniku, janë konsideruara të kundërligjshme dhe pa asnjë pasojë juridike.
“Dhe si të tilla vlerësoj se nuk përbejnë objekt deklarimi në Formularin e Vedeklarimit”, shprehet ai.
Në shkurt të vitit 2016, Prokuroria Speciale në Maqedoni përfshiu në hetimin për çështjen “Titaniku” edhe Edmond Themelkon, i cili u lajmërua zyrtarisht se u arrestua së bashku me zyrtarë të tjerë të lartë maqedonas.
Ata u akuzuan për manipulim të zgjedhjeve. Rreth 500 banorë të Pustecit, shtetas shqiptarë me kombësi maqedonase, rezultonin se ishin votues në Maqedoni.
Deklarata e plotë e Kryebashkiakut të Pustecit
Duke marrë shkas nga informacionet e dala nga mediat gjatë ditës së djeshme se kam fshehur fillimin e hetimit ndaj meje në Republikën e Maqedonisë, dua të sqaroj opinionin publik se:
Nuk kam asnjë arsye për të fshehur asnjë të dhënë, pasi fillimi i hetimit për çështjen “Titaniku” nga Prokuroria Speciale e Maqedonisë, dhe dyshimet për përfshirjen time në këtë proçes, dyshime të cilat kanë qenë politike pa bazë dhe pa asnjë fakt, janë bërë të njohura gjerësisht si në mediat shqiptare ashtu edhe në ato maqedonase.
Me vendimin për amnisti i shpallur nga ana e Presidentit të Republikës së Maqedonisë, z.George Ivanov me Dekretin Nr.42/16-7 datë 12.04.2016 të gjitha veprimet hetimore proceduriale ndaj meje janë konsideruara të kundërligjshme dhe pa asnjë pasojë juridike.
Në këto kushte, të gjitha veprimet proceduriale të kryera ne fillimi të hetimit, pa pasur akuza konkrete ndaj meje por thjesht vetëm dyshime, nuk pasjellin efekt juridike sepse jane konsideruar të pavlefshme dhe ne cenim te integritetit tim moral dhe politik.
Dhe si te tilla vlerësoj se nuk përbejnë objekt deklarimi ne Formularin e Vedeklarimit.
Për sqarime të hollësishme do të vë në dispozicion organeve kompetente shqiptare, aktet e institucioneve kushtetuese maqedonase për trajtimin e këtij rasti.
