Në 30 qershor nuk ka zgjedhje, pasi presidenti Ilir Meta shfuqizoi dekretin! Lajmin Edi Rama e mori live, duke mbajtur fjalën në Berat, ku prezantoi kandidatin për kryetar bashkie.
“Tani mora këtë letrën e më thotë që presidenti shfuqizoi dekretin për zgjedhjet. Përsëri gabim , përsëri unë po iu them zgjedhjet do bëhen në 30 qershor. Nuk jam i befasuar, e prisja edhe këtë! Dhe nuk është asgjë tjetër veçse mbyllja e një rrethi të një plani të bërë me kohë për një arsye të vetme. Nuk kërkohet shtyja e zgjedhjeve, kërkohet marrja zvarrë e kësaj qeverie dhe varrimi i reformës në drejtësi. Ky është thelbi, as gjë tjetër. As qeverinë nuk e marrin do zvarrë, as reformën. Ne në 30 qershor do të bëjmë zgjedhjet, nuk janë të partive, nuk janë të presidentit po të popullit shqiptar“, dekalroi Rama.
“Zgjedhjet e 30 qershorit kanë një rëndësi të veçantë. Janë zgjedhje me kundërshtarin më të rrezikshëm. Janë edhe më të rëndësishme sepse do të vendoset një vijë e qartë ndarëse mes të ardhmes për të cilën ne punojmë çdo ditë dhe të shkuarës që ata e mishërojnë sa herë që hapin gojën dhe duke na krijuar një situatë tërësisht të papranueshme. Ata kanë frikë nga zgjedhjet dhe për këtë arsye bërtasin. Ata i tremben gjykimit të njerëzve dhe kërcënojnë njerëzit se nuk do të votojnë. Ata janë të destinuar të humbin, ndërsa ne jemi në mision për të fituar, jo për vete, por për Shqipërinë që duam”, tha Rama më parë. Ai kujtoi edhe deklaratën e bërë paraditen e sotme nga Zëvendës Ndihmës-Sekretari i Shtetit në SHBA, Matthew Palmer.
“Të gjithë e keni dëgjuar sot prononcimin e qeverisë amerikane: Zgjedhjet e 30 qershorit nuk ka asgjë që i tund dhe kush do të guxojë t’i prekë do të shkundet nga rrënjët. Nuk besoj se do të gjenden shumë budallenj që të shkojnë pas atyre që kërkojnë njerëz për të sulmuar zgjedhjet. Unë jam i bindur se në fund do të fitojë arsyeja dhe PS”, tha Rama./ Opinion.al
