Këshilli Bashkiak i Hasit shpalli ditën e sotme Gafurr Mazrrekun “Qytetar Nderi”, me motivacionin “Personalitet Intelektual, në kontributin e pashoq në Pushtetin Vendor”.
Partia Demokratike hodhi akuza të ashpra ndaj Ramës. “Partia Demokratike e konsideron atë vetë, autorin e vendimit kriminal që nderoi me titullin më të lartë atentatorin e Tribunit të Demokracisë Azem Hajdari, që bashkë më studentët dhe qytetarët e Tiranës, rrëzuan regjimin e etërve të këtyre që drejtojnë sot vendin”, tha Strazimiri.
Sakaq, ka reaguar Presidenti i vendit Meta, i cili me anë të një deklarate për mediat thotë se çdo akt që prodhon konflikt duhet dënuar. “Vendimi i këshilltarëve të Hasit është një provokim i panevojshëm. Dekorimi i personave të dënuar nuk përputhet me standardet demokratike”, thotë Presidenti.
Në historinë shqiptare Gafurr Mazrreku njihet si i vetmi njeri që ka shkrehur një armë në ambientet e Parlamentit. Ishte viti 1997 kur Mazrreku, deputet i Partisë Socialiste, qëlloi në drejtim të rivalit të tij demokrat, Azem Hajdari, duke e plagosur atë. Për këtë u dënua me 8 vjet burg. Disa vite pasi kreu dënimin, Mazreku u nda nga jeta për shkaqe natyrale.
Tani nderohet nga Këshilli Bashkiak i Hasit, ku votimi kundërshtohet nga këshilltarët e djathtë.
