Gjyqtarja e Gjykatës së Lartë, Majlinda Andrea është shpallur në kërkim nga Policia pasi akuzohet për korrupsion.
Me anë të një deklarate, Prokuroria ka bërë me dije se gjyqtarja Andrea bashkë me bashkëshortin e saj, Odhise Andrea janë arratisur nga Shqipëria, pasi janë vënë në dijeni se Gjykata e Lartë kishte caktuar masën e arrestit ndaj tyre.
Nga burime konfidenciale të Opinion.al, është mësuar se dekonspirimi i aksionit të arrestimit të gjyqtares Andrea bashkë me të shoqin, ka ardhur pasi në hetim kanë qenë të përfshirë edhe shumë emra të tjerë të rëndësishëm në vend.
Mendohet se kjo ka qenë arsyeja kryesore që çifti Andrea është bërë me dije për caktimin e masës së arrestit me burg nga Gjykata e Lartë.
Gjyqtarja akuzohet se ka marrë 50 mijë euro për të dhënë një vendim në favor të një shtetaseje në një çështje ku ajo gjykonte.
Gjithashtu, është bërë me dije se për korrupsion është akuzuar edhe i shoqi i saj, sipas burimeve të Prokurorisë, ai ka luajtur rolin e sekserit.
Ndërkohë, janë arrestuar nga ana e Policisë së Shtetit, tre të dyshuarit Ilia Çabiri, Petraq Dashi dhe Eleni Lino.
Këta tre shtetas dyshohet se i kanë paguar gjyqtares Majlinda Andrea 50 mijë euro për të dhënë një vendim në favor të tyre, në një proces njohjeje prone që ishte në shqyrtim në Gjykatën e Lartë.
