Një ditë pas përfundimit të vizitës së zyrtares së larte amerikane në Tiranë, në politikë mbizotëron heshtja. Presim për të parë draftin e ri që u la në tavolinë znj. Nuland. Ajo vetë e tha dje se është një “variant hibrid”. Po Basha dhe Rama si reaguan dje? Kemi shkëputur thëniet kryesore të tyre, të bëra dje pas takimeve…
Ndihmës Sekretarja e Shtetit Victoria Nuland:
“Në mënyrë që të ndihmojnë palët që të mund të mbushin atë hapësirë bosh Ambasadori Lu dhe kolegia e tij e BE, Romana Vlahutin kanë pasur mundësinë që të realizojnë një propozim të ri i cili është për diskutim.
Një variant hibrid që ka marrë ide nga qeveria, nga opozita dhe është tërësisht në përputhje me propozimin e Komisionit të Venecias. Ky propozim ka mbështetjen time, por gjëja më e rëndësishme është se ka mbështetjen e gjerë nga Uashingtoni dhe lidershipi aty.”
Kryeministri Edi Rama:
“Shumica qeverisëse do të mbetet deri ditën e fundit e hapur për çdo kompromis që nuk cenon thelbin e reformës dhe njëkohësisht, vlerësohet nga partnerët tanë strategjike, si në përputhje të plotë me objektivin e përbashkët për një drejtësi të denjë për një vend anëtar të Bashkimit Europian.”
“E falenderova miken e Shqipërisë Victoria Nuland për angazhimin e fortë të SHBA për Reformën në Drejtësi. Dakordësi e plotë qendrimesh.”
Kryetari i Partisë Demokratike Lulzim Basha:
“Kjo reformë mund dhe duhet të miratohet vetëm me konsensus politik. Nuk ka dhe nuk mund të ketë asnjë themel tjetër të shëndoshë për reformën në drejtësi, veç konsensusit politik mes palëve.”
“E vetmja kërkesë që kemi është që të mbetemi brenda suazës së rekomandimit 88 për t’i dhënë Shqipërisë një reformë në drejtësi me konsensus politik.”
