“Ekspertët e sistemit të drejtësisë vlerësojnë se sulmet e rejat të kryeministrit Edi Rama ndaj SPAK dhe Gjykatës së Posaçme kanë si qëllim që të minojnë besimin e qytetarëve të sistemit si dhe ta vendosin atë nën presion”, ishte ky shkrim që ka nxitur një tjetër reagim të kryeministrit Edi Rama sa i takon qëndrimit të tij ndaj SPAK.
Rama në reagimin e tij në “X” shprehet se nuk e di kush janë këto ekspertë, por thekson faktin që sipas tij ‘kur dikush i cili s’është dakord me ty të akuzon se ke një qëllim që nuk e ke, atëherë (akuzuesi) ose është një i sëmurë ideologjikisht, o është një kundërshtar kokëboshose pastaj një daullexhi i paguar’.
Kryeministri thekson se qëllimi i tij është i shpallur teksa qëndron në atë që ka përmendur shpesh ditët e fundit, një ‘Drejtësi Europiane për Shqipërinë 2030’.
“Nuk e di kush janë këta ekspertët, po di që kur dikush i cili s’është dakord me ty të akuzon se ke një qëllim që nuk e ke, atëherë (akuzuesi) o është një i sëmurë ideologjikisht, o është një kundërshtar kokëbosh ose pastaj një daullexhi i paguar… Zakonisht këtej nga anët tona janë këta dy të fundit. Ndërsa qëllimi im është i shpallur: Drejtësi Europiane për Shqipërinë 2030”, shkruan Rama.
