Presidenti Ilir Meta hodhi kritika ndaj deklaratave të kryeministrit Edi Rama, se vendet e BE-së “nxorrën bishta” për mos hapjen e negociatave. Kreu i Shtetit tha se Shqipëria duhet të bëjë më tepër për të fituar besimin e vendeve të unionit që nuk ishin dakord me nisjen e bisedimeve.
“Nuk mjafton të themi që Franca dhe Holanda kanë probleme të brendshme, në rast se ne jemi burim për shqetësimet e tyre, sa i takon azilkërkuesve të paligjshëm dhe krimit të organizuar. Duhet të reagojmë me më shumë përgjegjshmëri që shqetësimet të shuhen në javët dhe muajt që vijnë. Dhe të bëjmë të qartë se çdo ide tjetër, edhe informale qoftë, për vendet tona dhe Ballkanin Perëndimor është e papranueshme dhe e padobishme”, tha Presidenti, duke kundërshtuar kështu Shengenin Ballkanik.
Të enjten, në emisionin Opinion, Kryeministri Edi Rama tha se Bashkimi Europian nuk i ka qëndruar angazhimeve të veta dy herë, një herë në 2018-n dhe herën e dytë në Qershor të këtij viti.
Sipas kryeministrit një nga shqetësimet e Francës dhe të Presidentit Macron, për azilkërkuesit shqiptarë, janë bishta që përdoren për politikë të brendshme./ Opinion.al
