Ministri i Shëndetësisë Ilir Beqaj ka reaguar menjëherë në profilin e tij në fb lidhur me audiopërgjimin e transmetuar këtë mbrëmje nga emisioni investigativ “Stop”, Ku Beqaj dëgjohet teksa shkarkon me telefon Drejtorin e Fondit Kujdesit Shëndetësor Tropojë, Çlirim Hajdarmataj. Beqaj e ka pranuar bisedën por ka thënë se nuk e ka shkarkuar Hajdarmatajn pse nuk erdhi në mbledhjen e Partisë Socialiste Tropojë, por se ishte kapur në shkelje në detyrë.
Më poshtë statusi i plotë i ministrit Beqaj
Po, ajo çka është inçizuar dhe transmetuar sonte si një “skandal” i madh, është e vërtetë, por jo e gjithë e vërteta. Sepse, faktikisht, zotëria nuk është larguar nga puna si anëtar i padisiplinuar i PS-së dhe as është larguar me kërkesën time.
Por, është larguar pasi është kapur në shkelje flagrante të ligjit.
Shkelja në fjalë ishte se i ka paguar rrogën për tre muaj personit në detyrën e ekonomistit, i cili që nuk ka qenë fare në Shqipëri gjatë kësaj kohe.
Kështu që, duke shprehur keqardhjen që “u mbars mali e polli një mi”, si dhe duke i siguruar teleshikuesit apo lexuesit e gjysëminformuar mbi këtë episod, se hakmarrja e asnjëlloj natyre nuk është as pjesë e kulturës sime shoqërore, apo aq më pak e edukatës sime familjare, mbetem i përkushtuar në realizimin e objektivave të Qeverisë në sektorin ku kam nderin të drejtoj si ministër i shëndetësisë
