Presidenti Ilir Meta komentoi dhënien e autorizimit për Ministrin e Jashtëm, Ditmir Bushati lidhur me negociatat me Greqinë.
“Besoj se tashmë kemi realizuar një bashkëpunim mjaft konstruktiv dhe të dobishëm për të patur një proces solid nga pikëpamja kushtetuese, por edhe tekniko-ligjore për negociata sa më të suksesshme për një marrëveshje të drejtë me Greqinë”, tha Meta në një aktivitet për festën e “Sulltan Novruzit” të Komunitetit Bektashi.
Ndërsa iu përgjigj interesimit të medias për negociatorin e ri Ksenofon Kristafi. “Ka qenë një propozim shumë pozitiv edhe mjaft i mirëpritur dhe nga ana ime për arsye sepse është një personalitet në fushën e të drejtës ndërkombëtare, por dhe me mjaft eksperiencë për raste te tilla.”
Meta dha autorizimin të hënën pas dy refuzimeve të njëpasnjëshme. Dhënia e autorizimit vjen pak ditë pas takimit që Presidenti Meta zhvilloi në Presidencë me kryeministrin Rama, takim për të cilin nuk u dhanë detaje, por në qendër të të cilit ishin pikërisht negociatat me Greqinë.
