Presidenti i Kosovës Hashim Thaçi ka folur sot në Samitin e Diasporës. Ai është shprehur për temën e shkëmbimit të kufijve, duke thënë se “Keni dëgjuar shkëmbim territoresh gjatë kësaj vere: Kurrë nuk do të ndodhë”, u shpreh Thaçi, mes duartrokitjeve të pjesëmarrësve.
“Keni dëgjuar shkëmbim territoresh gjatë kësaj vere: Kurrë nuk do të ndodhë. Për shkëmbim territoresh kam folur dhe më herët, shkëmbimi i territoreve është pazar dhe askush nuk mund të bëjë pazar me kauzën kombëtare. Pa shkelur në trupin tim, askush nuk do të shkelë një milimetër të territorit të Kosovës. Ata që flasin sot janë mbështetësit e Millosheviçit. Në anën tjetër, korrigjimi i kufijve, “Po!”, sepse askush nuk ma heq të drejtën e bashkimit të Medvegjës, Bujanocit dhe Preshevës me Kosovën pa cenuar kufijtë e Kosovës”, ka thënë Hashim Thaçi.
Presidenti i Kosovës gjithashtu tha se sot Kosova është në fazën finale të një marrëveshjeje me Serbinë, që do të çojë në njohjen reciproke të dy vendeve dhe anëtarësim të Kosovës në Organizatën e Kombeve të Bashkuara.
“Jemi në rrethanë të re, në moment të volitshëm, ku Kosova me mbështetje të Shteteve të Bashkuara të Amerikës, të Bashkimit Europian, po përgatitet të hyjë në dialogun përfundimtar me Serbinë për arritjen e një marrëveshjeje gjithëpërfshirëse. Synimi i Kosovës është një marrëveshje e cila do të garantojë njohjen reciproke mes Kosovës dhe Serbisë, dhe anëtarësimin e Kosovës në OKB. Ne të gjithë e dimë se çfarë ka bërë Serbia në Kosovë. Sot natyrisht ka ide të ndryshme, por ajo që dua të them është kjo: Nuk do të lejoj organizimin e ndonjë konference ndërkombëtare ku merr pjesë Rusia. Marrim pjesë vetëm në ato konferenca ku organizohen nga BE dhe merr pjesë SHBA. Nuk do të lejojmë të qarkullojë asnjë ide për union ballkanik. Ideja e një unioni ballkanik është cenim i kombit tonë, i perspektivës euro-atlantike. Unioni i Kosovës, i kombit shqiptar është unioni në Bashkimin Europian dhe mbështetja e Shteteve të Bashkuara”, tha Hashim Thaçi./Opinion.al
