Kryetari i Grupit Parlamentar, Gazment Bardhi ka reaguar pas deklaratës së Presidentit, Bajram Begaj për nisjen e sesionit të ri parlamentar.
Në reagimin e tij, Bardhi thotë se qëndrimi Presidentit, i cili nuk e përmendi aksionin e opozitës gjatë fjalës së tij, është mesazhi më i dëmshëm që mund të bënte për normalizimin e jetës parlamentare.
Sipas Bardhit, Begaj tregoi njëanshmëri dhe u bë palë e konfliktit politik në Kuvend dhe se e nxiti edhe më shumë atë.
Për Bardhin, deklarata e Presidentit është një sulm ndaj opozitës, ndërsa theksoi se aksioni në parlament do të vijojë.
Reagim i Kryetarit të Grupit Parlamentar të PD, Gazment Bardhi
Qëndrimi publik i Presidentit të Republikës është mesazhi më i dëmshëm që mund të bënte për normalizimin e jetës parlamentare. Ashtu siç pritej, Kreu i Shtetit nuk u ngrit dot në rolin e tij si përfaqësues i unitetit të popullit, por me një gjuhë të njëanshme, u bë palë në konflikt dhe nxiti edhe më shumë përçarjen mes palëve politike në Kuvend. Duke e konsideruar këtë një akt antidemokratik dhe një sulm të pashembullt të Presidentit të Republikës ndaj opozitës, e siguroj që Grupi Parlamentar i PD dhe opozita është e vendosur të mbrojë pluralizmin demokratik në vend dhe Kushtetutën e Shqipërisë, edhe nëse Kreu i Shtetit ka vendosur t’ia dorëzojë kopjen e tij të Kushtetutës kryeministrit Edi Rama!/ Opinion.al
