Ai është vetëm 22 vjeç, por me shumë mundësi këtë të premte do të debutojë si portieri i kombëtares shqiptare. Thomas Strakosha ka lindur e është rritur në Greqi, por karrierën e tij profesionale po e zhvillon në Itali, pranë klubit të Lazio-s. Ai ka pasur një sezon shumë të mirë me klubin Italian, ndërsa sot pritet të dalë në fushë kundër kombëtares së atij vendi.
Gjatë grumbullimit të tij me kombëtaren, Thomas ka dhënë intervistën e tij të parë në shqip për emisionin “Opinion”.
“Emocionet janë të shumta, sepse në Itali jam rritur si sportist, për mua, nëse debutoj me kombëtaren do jetë realizimi i një ëndrre që kisha që i vogël”- tregon pak para ndeshjes së tij të parë me kombëtaren.
Por, a do të jetë e vështirë për të të luajë përballë shokut të tij të skuadrës?
“Motivohem më shumë kështu. Dua të kthehem në ekip si fitues jo si humbës.”- shprehet 22 vjeçari.
Thomas mban mbi supe një mbiemër të njohur dhe shumë të dashur për shqiptarët, atë të babait të tij, Foto Strakosha, i cili gjithashtu ka mbrojtur portën e kombëtares.
“Ndonjëherë më thërrasin, Foto, Foto, por është normal. Avash avash do thonë vetëm Thomas.”
“Po përpiqem shumë që të vijë ajo ditë kur do thonë ‘Foto, babai i Thomasit’ dhe besoj për këtë do jetë i lumtur edhe babi.”- tregon ai./opinion.al
Për më tepër ndiqni intervistën e plotë më poshtë:
