Dibra është një tjetër qark i vendit ku bora dhe ngricat e ditëve të fundit ka dëmtuar pemët. Kulturat më të prekura janë qershitë, mollët, kumbullat apo dardhët.
“Unë kam punuar këtu, punimi, plehu, spërkatja ka shkuar në 1 milionë e 700 të vjetra. Kemi pasur dëme te të gjitha pemët, si qershinë, kumbullën, mollën, disa lloje variantesh, dardhën patjetër, ndërsa ngricat e mëparshme na prishën edhe pjeshkat e zerdelitë”, thonë banorët.
Sipas specialistëve të bujqësisë, prodhimi është dëmtuar masivisht.
“Thuajse e gjithë Dibra e ka pësuar këtë dëmtim. Duke filluar nga zonat e ulëta në brigjet e Drinit deri në lartësitë lart. Se dhe lartësitë e mëdha si rezultat i temperaturave të ngrohta, gjatë muajit Mars, ka pasur avancim në lulëzimin e tyre. Kështu që dhe ato kanë qenë afërsisht në të njëjtën fazë zhvillim. Prandaj them që dëmi është thuajse 100%”, thotë një specialist.
Specialistët e bujqësisë në Dibër kanë dalë në terren për të bërë verifikimin e dëmeve./ Klan News
