Është zhvilluar sot mbledhja e Kryesisë së PD ku janë marrë një sërë vendimesh të rëndësishme.
Ajo ç‘ka u vu re në përfundim është se Basha propozoi dhe Kryesia votoi që drejtues të qarqeve për përgatitjen e zgjedhjeve do të jenë ish ministrat e kabinetit Berisha, si Arben Imami, Flamur Noka, Genc Pollo, Genc Ruli, etj.
Por kjo zgjedhje u kritikua nga Ervin Salianji i cili është sekretar për Aksionin qytetar në PD.
Opinion.al përmes burimeve brenda kryesisë ka mësuar se Salianji i është drejtuar Bashës me fjalët se shqiptarët presin të përfaqësohen nga ekipi i ri Basha dhe jo nga imazhi i humbjes së zgjedhjeve 2013-2015.
Sakaq është votuar edhe për kryetarët e degëve, ku do ketë një riformatim, nga 53 do të bëhen 67 degë të PD në rrethe.
Në 35 prej tyre do zhvillohen zgjedhje partiake. Edhe për këtë temë Salianji ka shfaqur kundërshti. Por ajo që ka marrë vwmendjen më të madhe ka qenë diskutimi për “xhaketat“ e vjetra të partisë.
“Ekipi Basha duhet të shkojë në zgjedhje me fytyra të reja. Unë mendoj se janë konsumuar emrat e lartpermendur“, ka thënë Salianji.
Ka reaguar Imami duke thënë se; “duhet të jesh serioz sepse nuk jemi ne përgjegjësit e vetëm të humbjes“.
Edhe Flamur Noka ka kërkuar që të mos quhen fytyrat e humbjes.
Basha nuk është terhequr nga emrat e propozuar, i ka hedhur në votim dhe kanë marrë votat pro të kryesisë. Votë kundër ka qenë vetëm ajo e Ervin Saljanit. Interesimit tonë, mbi reagimin e Bashës, burimi brenda Kryesisë tha se Basha tha se “këta janë figura përfaqësuese dhe me eksperiencë“.
Por ai ka thënë se 12 të deleguarit e PD në qarqe do të merren me organizimin e zgjedhjeve deri në Korrik. Të presim çdo ndodhë më tej në selinë blu, ku shfaqen edhe pakënaqësitë e para…
Pjesë e pakënaqësive është edhe Enno Bozdo puna e të cilit kundërshtohet në PD, për mungesë organizimi dhe koordinimi me bazën./Opinion.al
