Kandidatja demokrate për presidente të Shteteve të Bashkuara, Hillary Clinton e ka fituar debatin e dytë presidencial, kundër rivalit të vet republikan, Donald Trump, sipas një sondazhi të CNN-it.
Sipas këtij sondazhi, 57% e njerëzve ndiejnë se Hillary e ka fituar debatin, krahasuar me 34% të të anketuarve të tjerë që besojnë se Trump ka përformuar më mirë.
Një sondazh tjetër nga YouGov, gjeti se 47% e të anketuarve thanë se Hillary e ka fituar debatin, ndërsa 42% menduan se Trump ishte fituesi.
Në mesin e njerëzve, të cilët më parë kishin qenë të pavendosur se për kë të votojnë, Hillary fitoi ngushtë me 44%, ndërsa Trump mori vetëm 41%.
Debati u drejtua nga gazetarët e CNN dhe NBC, ndërsa me asistencën e udhëheqësit të pranishmit në audiencë kishin mundësinë të shtrojnë pyetje. Në prag të debatit, Clinton dhe Trump nuk kanë shtrënguar duart si tradicionalisht, por që në fillim, nisën me akuza të ndërsjella.
Clinton menjëherë iu referua komenteve ofenduese të Trump ndaj grave, të cilës biznesmeni kontrovers iu përgjigj se sjellja e ish-presidentit Bill Clinton, burrit të Hillary Clinton, ndaj grave ishte edhe “më e keqe se e tij”.
“Tek unë ka të bëjë me fjalë, ndërsa tek ai me vepra”, ka thënë Trump.
Trump ka thënë se nëse ai zgjidhet për president të Amerikës do të emërojë një prokuror të posaçëm për të udhëhequr hetime ndaj Clinton.
