Dy javë përpara referendumit të shumëpërfolur për daljen e Britanisë së Madhe nga Bashkimi Europian, kryeministri britanik David Cameron zhvilloi një debat televiziv me deputetin euroskeptik Nigel Farage. Duke udhëhequr fushatën “pro” qëndrimit në BE, kryeministri akuzoi ata që janë “pro” daljes nga blloku se duan të dëmtojnë ekonominë e Britanisë së Madhe.
David Cameron, Kryeministër i Britanisë së Madhe: “Nëse dalim nga BE do t’u nënshtrohemi rregullave tregtare që ka vendosur Brukseli, por nuk do të jemi të ulur në të njëjtën tavolinë. Do të kthehemi në një vend që do të presë të shohë se ç’ndodh me 27 vendet e tjera, të cilat do vendosin rregulla kundër nesh.”
Nigel Farage, lideri i Partisë së Pavarësisë u tregua i ashpër me projektet e Bashkimit Europian dhe vuri theksin tek kriza e emigrantëve.
Nigel Farage, Lider i UKIP: “Unë mendoj se Eurozona është një katastrofë, vetëm shihni se çfarë i bënë Greqisë dhe vendeve të tjera të Medheut. Kriza e emigrantëve jo vetëm po ndan vendet nga njëri-tjetri, por po përçan edhe politikat e brendshme të tyre.”
Sipas sondazheve të fundit në Britani, kryesojnë ata që janë kundër daljes së vendit nga blloku europian. /Tvklan
