Mbledhja e radhës e grupit parlamentar të PS-së u shoqërua me debate ditën e sotme. Deputeti Ben Blushi ka shtruar çështjen e referendumit për diskutim, duke nxehur gjakrat.
Referendumi sipas tij është i manipuluar, pasi nuk ka ende asnjë shifër të saktë se sa ka qenë pjesëmarrja dhe se sa kanë votuar për “Po” apo për “Jo”.
Gjithashtu, Blushi ka kërkuar materialet zgjedhore të referendumit dhe kutitë, duke hedhur dyshime se ato janë mbushur me vota.
Këtu ka ndërhyrë deputetja Gjylameti, e cila është përplasur me Blushin indirekt. Ajo është shprehur se kur e gjithë PS-ja ishte e shqetësuar për Erjon Braçen që u sulmua në Parlament, Blushi merrej me referendumin.
Në këtë mënyrë, Gjylameti e vuri në plan të dytë referendumin e së shtunës.
DEBATET
Blushi: Kërkoj të më vihen në dispozicion materialet zgjedhore të referendumit. Jam i bindur që pjesëmarrja ka qenë më e ulët dhe rezultati nuk është ai. Kutitë janë mbushur.
Ruçi: S’jemi përgjegjës për materialet zgjedhore. Bëji kërkesë komisionit zgjedhor të partisë për materialet
Blushi: Nuk u lejova të kisha vëzhgues…
Ruçi: Po sepse s’ke depozituar asnjë kërkesë zyrtare për këtë.
Gjylameti: Të enjten ne ishim të shqetësuar për kolegun Braçe, ndërsa Blushi vinte dhe me kërkonte llogari për shifrat e anëtarësisë.
Ruçi: Është respektuar Kodi Zgjedhor i partisë. Kanë votuar vetëm anëtarët e regjistruar deri në 31 dhjetor 2015./Panorama
