TIRANE- Në mbledhjen e djeshme të grupit të PS, Blushi ka debatuar me Ruçin për çështjen e kutive të votimit në referendum. Sipas Blushit, kutitë janë mbushur dhe kjo duhet të verifikohet nëpërmjet listave të zgjedhësve dhe procesverbaleve të votimit. Në mbledhje mungonte Rama, i cili gjendet në SHBA. Sakaq në debat janë përfshirë edhe Braçe e Gjylameti. Lexoni më poshtë debatin mes tyre që e ka zbardhur gazeta “Mapo”.
Blushi: Ajo që ndodhi të shtunën ishte një turp për Partinë Socialiste. Aq qesharake ishte sa jemi bërë objekt talljesh edhe nga të huaj. Unë jam i bindur që kutitë janë mbushur dhe pjesëmarrja ka qenë e ulët. Ndaj kërkoj nga ju që të bëni të mundur dorëzim të materialeve zgjedhore të këtij referendumi që të kemi mundësi për të parë.
Ruçi: Blush, këto mos na i thuaj neve këtu, por mund t’ua thuash mediave ashtu siç ke bërë edhe herë të tjera. E ke bërë rrugë tashmë që ato që duhet t’i kërkosh këtu, vete i kërkon aty poshtë (në media), dhe ato që duhet t’i kërkosh atje poshtë, vjen i kërkon këtu.
Blushi: Ajo që po kërkoj është që të më vihen në dispozicion materialet zgjedhore, për të parë sa votuan dhe si votuan. E vetmja mënyrë për të verifikuar këtë është hapja e kutive?
Ruçi: Dhe unë po të them se je drejtuar gabim, nuk jemi ne që administrojmë as kutitë as procesin e votimit. Drejtohu te Komisioni i Zgjedhjeve në parti zyrtarisht për të marrë atë që do. Saimiri, Taulanti dhe të gjithë ne të tjerët shkuam te KQZ kur bëmë betejën për kutitë…
Blushi: Nuk m’u lejua të kisha vëzhgues në referendum dhe besoj se kam të drejtën që të di se çfarë u bë me votat dhe pjesëmarrjen…
Ruçi: Nuk ke depozituar asnjë kërkesë zyrtare për këtë gjë, pra për të pasur vëzhgues. Ndaj nuk ka kuptim që të vini ta bëni tani këtë debat.
Gjylameti: Doja të ngrija dhe unë një shqetësim për këtë sjellje të vazhduar nga kolegu ynë. Gjatë seancës së të enjtes, në Kuvendin e Shqipërisë, ndërsa ne ishim të angazhuar dhe të shqetësuar për kolegun Braçe, Blushi vinte dhe më kërkonte llogari për shifrat e anëtarësisë.
Ruçi: Meqë është ngritur ky shqetësim dhe në media është shkruajtur për këtë gjë, dua të sqaroj edhe një herë se është respektuar plotësisht Kodi Zgjedhor i partisë. Në referendum kanë votuar vetëm anëtarët e regjistruar deri në 31 dhjetor 2015. Dhe këtë gjë e dinim të gjithë që më parë dhe kjo është bërë pikërisht për të mos pasur pretendime se në lista po futeshin njerëz që të votonin dhe të mbushnin kutitë. Këtë gjë e bëmë edhe për të përcaktuar numrin e delegatëve të Kongresit.
Braçe: Ndërsa unë kam vetëm një merak për seancën plenare. Është bërë e disata herë që ministrat nuk vijnë në seancë dhe duhet që punën e tyre ta mbrojmë ne në parlament. Kjo nuk shkon që ne të mbrojmë punën e tyre ndërsa ata mungojnë.
Ruçi: Ministrat të jenë të pranishëm në Kuvend. Është ngritur dhe herë të tjera ky shqetësim dhe ju vazhdoni ta shkelni këtë detyrim.
Braçe: Të jenë në seancë, dhe jo të vijnë vetëm kur vjen Kryeministri, se kur është ai vetë, ju jeni rehat në sallë.
