TIRANË- Mbledhja e sotme e grupit të PS, e drejtuar nga Gramoz Ruçi dhe ku mungonte kryetari Edi Rama është shoqëruar me debate të shumta. Disa prej tyre kanë dalë në media edhe pse mbledhja u zhvillua me dyert të mbyllura.
Deputetja Arta Dade ka kërkuar një analizë të detajuar të punës së deritanishme nga qeveria. “Jemi në një moment kur pothuajse të gjithë ministrat janë në fokusin e akuzave të opozitës prandaj e shikoj të udhës që ministrat të vinë përpara nesh e të na thonë se çfarë është përmbushur nga programi ynë qeverisës”, mësohet se është shprehur Dade.
Ndërsa Gramoz Ruci i cili ka thënë se “unë dhe ti zonja Dade jemi nga me të vjetrit në këtë parti dhe një analizë e tillë në bllok e ministrave nuk ka ndodhur ndonjëherë. Megjithatë jemi të hapur për çdo shqetësimin të deputetëve të vijnë ministrat sipas problematikës dhe të japin shpjegime”.
Sipas Top Channel, që zbardhi disa prej debateve të zhvilluara në mbledhje, deputeti i Vlorës Fatmir Toçi ka folur ashpër për Koço Kokëdhimën. “Ai është kthyer në beun e jugut duke mos përfillur kolegët, madje nuk i fton në takime të zonës”, ka deklaruar Toçi, duke e fajësuar Kokëdhimën për vonesat në zgjedhjet në Partinë Socialiste për qarkun Gjirokastër-Vlorë.
Përgjigja e Gramoz Rucit ka qenë: “Nuk është etike të flasim për çështje kur kolegu deputet nuk është mes nesh. Ju në territorin që mbuloni jeni inekzistent në zbatim të vendimit të Asamblesë Kombetare. Ju të gjithë deputetët e qarkut Vlorë, Gjirokastër jeni jashtë linjës. Keni shmangur me apo pa dashje vendimet e Asamblesë. Përgjegjesia për mbajtjen peng të zgjedhjeve në Vlorë dhe Gjirokaster është e juaja, e të gjithë deputetëve të zonës”, ka thënë Ruçi.
