Është shoqëruar me debate mbledhja e sotme në Komisionin e Ekonomisë ku po diskutohet mbi defiçitin dhe borxhin e parashikuar në projektligjin për buxhetin e vitit 2023.
Ka qenë deputetja e Partisë Demokratike, Jorida Tabaku e cila ka debatuar me ministren e Financave dhe Ekonomisë, Delina Ibrahimaj.
Teksa ishte duke folur për buxhetin, Tabaku ndërpreu fjalën e saj dhe i tërhoqi vëmendjen ministres Ibrahimaj, që sipas saj ishte duke qeshur.
“Me buxhetin e këtij viti jeni duke u angazhuar të akomodoni ato fonde që aktualisht janë tenderuar. A ka paguar qeveria garantin 1% të pushtetit vendor. Detyrimet sipas kontratave që sot janë detyrime përfundimtare a janë marrë parasysh tek detyrimet e prapambetura. Sipas regjistrit të borxhit nuk ka asnjë kredi të butë të regjistruar. Nuk ka asgjë për të qeshur zonja ministre, po unë po ju shoh se këtu përballë jemi. Nëse ju bën për të qeshur fakti se nga 1.9 % është 3.3% e produktit të brendshëm bruto, pagesat e interesit janë sa fondi i arsimit, më duket papërgjegjshmëri. Të mos flas për papërgjegjshmëri me fondin e rindërtimit pasi është një temë më vete”, tha Tabaku.
Nga ana tjetër, ministrja iu përgjigj duke i thënë se po e dëgjonte me vëmendje fjalën e saj.
“Unë po ju dëgjoj me vëmendje”, u shpreh Ibrahimaj.
Në mbrojtje të ministres Ibrahimaj ka dalë dhe kryetari i Komisionit Eduard Shalsi, i cili tha se ministrja nuk po qeshte, ndërsa shtoi se nuk duhet të provokohen ngjarje të tilla, pasi sipas tij nuk i vlejnë debatit.
“Ministrja nuk mu duk se po qeshte, të paktën etikën në këtë Komision e kemi ruajtur. Mundet që edhe unë të bëj provokime për mënyrën e të mbajturit të kokës, por këto gjëra nuk besoj se vlejnë,tha Shalsi./Opinion.al
