Sonte luhet ndeshja eliminatore, Shqipëri-Maqedoni, në orën 20:45, në “Loro Boriçi”. Trajneri i kuqezinjve, De Biazi, ka dalë në konferencën e zakonshme për shtyp, bashkë me kapitenin Ansi Agolli, duke nënvizuar rëndësinë e madhe që ka ky ballafaqim, si starti i një kapitulli të ri, kualifikueset e “Rusia 2018”, Grupi G.
Pjesë nga fjala e De Biazi: “Kemi bërë gjithçka ka qenë e mundur që ta përgatisim sa më mirë këtë ndeshje, pasi në jetë nuk ka asgjë të thjeshtë. Europiani tregoi se çdo ekip mund të ecë përpara, nëse ka dëshirë dhe përqëndrim, ndaj do ta konsiderojmë ndeshjen me Maqedoninë si finalen e një Europiani. Nuk duhet ta nënvlerësojmë kundërshtarin, sepse do të gabonim. Duhet t’i kushtojmë rëndësi kësaj sfide, pasi është e vështirë të luash ndaj ekipeve të tilla.
Më e lehtë është të luash ndaj Spanjës apo Italisë, pasi ekipi nuk ka nevojë për motivim. Nga lojtarët pres që të japin maksimumin në fushë. Sa i përket formacionit, besoj se nuk do të ndryshojë shumë. Skuadra do të jetë e njëjtë si në Europian. E kemi studiuar kundërshtarin dhe do të aplikojmë ato që kemi bërë në stërvitje. Është e vërtetë që është larguar Cana, por kemi grumbulluar sërish Gjimshitin dhe kanë ardhur Hykaj me Manajn.”
Ndërsa Agolli u shpreh: “Ndaj Maqedonisë e rëndësishmë është të marrim një rezultat pozitiv. Kapiteni? Nuk ka rëndësi se kush do të jetë. Përballë nuk kemi një emër të madh, por do të jetë një ndeshje e vështirë. Javën e fundit kemi marrë shumë njohuri përsa i përket rivalit. Lojtarët shqiptarë që luajnë për Maqedoninë janë shumë cilësorë, ashtu si edhe lojtarët e sulmit.”
/telesport.al
Video: Konferenca, De Biasi, Agolli dhene diten e djeshme
