Trajneri i Kombëtares së Futbollit, Gianni De Biasi ka komentuar ecurinë e futbollistëve tanë që luajnë në Seria A. Ai është ndalur te dy talentet më të spikatur si Eleseid Hysaj te Napoli dhe Rey Manaj te Interi. De Biasi thotë se Manaj ka mjaft potencial, por duhet të hedhë hapa të menduar për karrierën dhe qëndrimin te Inter.
Gianni De Biasi – Trajner i Kombëtares: “Mendoj se nëse ka vendosur që të qëndrojë te Inter duhet të mendojë të jetë pjesë e një projekti. Pra duhet të shohë cilat janë planet e Inter. Një djalë si ai është e domosdoshme që me aftësitë që ka duhet të vihet në provë çdo javë në fushë. Për rritjen e tij është i rëndësishëm ky aspekt”.
Ndërsa për Hysajn, mbrojtësin e djathtë të Napolit që çdo javë është në formacionin bazë, tekniku italian thotë se ai po rritet vazhdimisht nga ana profesionale.
Gianni De Biasi – Trajner i Kombëtares: “Hysaj është një lojtar që sipas meje ka cilësi të mëdha teknike dhe fizike. Një lojtar që ka mjaft personalitet. Është një lojtar që te Napoli ka një rritje të vazhdueshme”.
De Biasi i bëri komentet pas marrjes së çmimit special “Pankina e artë” akorduar nga Federata Italiane e Futbollit. Ai i dedikoi këtë çmim lojtarëve të Kombëtares që dhanë maksimumin për kualifikimin në Euro 2016. /Tv Klan
