Një kapitull mbyllet, historik, sikurse ishin finalet e “Euro 2016”, një tjetër hapet së shpejti. Në shtator starton fushata kualifikuese në grupe për “Botërorin 2018”, ku Shqipëria do të garojë përkrah emrash të tillë si Italia, Spanja, Izraeli, Maqedonia dhe Lihtenshtejni (Grupi G).
Më saktësisht, më 5 shtator presim Maqedoninë në “Loro Boriçi” të Shkodrës, për të vijuar më tej me rrjedhën normale të eliminatoreve. Kësisoj, De Biazi ka pak kohë për t’u relaksuar pas tensionit dhe presionit të Europianit të Francës dhe të nisë të mendojë për kompeticionin pauses.
Në fjalën e tij, pas eliminimit nga “Euro 2016”, 60-vjeçari nga Sarmede nuk harron të shohë përpara, në këtë drejtim:
“Në shtator fillojnë kualifikueset e Botërorit të Rusisë. Duhet të jemi të qartë për diçka, për mundësitë dhe limitet tona. Me këtë dua të them se, po e vendosëm veten në të njëjtin nivel me Spanjën dhe Italinë, atëherë e nisim me këmbën e gabuar. Mendoj se këto dy rivalë tanët në Grupin G, favoritë absolutë për dy vendet e para, kanë vlera teknike më të mëdha, kanë një histori shumë më të rëndësishme se e Shqipërisë. E dimë që ndoshta jemi skuadra e tretë në grupin kualifikues, shpresojmë të jemi të tretët nga pikëpamja cilësore.
Pastaj diferencën e bën se si në fushë do të arrijmë t’i luajmë ndeshjet, nëse kujtohemi se çfarë na mundësoi të vijmë deri në këto nivele. Unë mendoj se ishte kohezioni i grupit, dëshira për të çuditur dhe dëshira për të menduar se nuk kemi arritur, por se jemi ende në stacionin e parë të rrugëtimit tonë.
Do të vijojmë kështu, me këtë qasje taktike, apo do të ndryshojmë, kjo mbetet për t’u parë. E dimë se shënojmë pak, por kjo nuk lidhet aq shumë me skemën që aplikojmë. Mund të luaj edhe me 3-4 sulmues, siç bëmë kundër Ukrainës dhe pastaj të pësojmë 3 gola. Luajmë me atë që hedhim në fushë dhe mendoj se skuadrat jetojnë mbi ekuilibra të hollë, që duhen marrë shumë në konsideratë. Mua do të më pëlqente të luaja me tre sulmues të mirëfilltë, por do të na duhej të luanim me tre mesfushorë të një tipi të veçantë, katër mbrojtës të një tipi. Do të studiojmë sisteme të reja loje gjatë kësaj periudhe, shpresojmë që të kemi kohën për t’i përgatitur. Por, mendoj se duhet të nisemi nga siguritë që kemi marrë nga ky edicon, edhe pse e kemi mendjen shumë dinamike dhe mendojmë gjithmonë si të përmirësojmë situatën.”
