David Villa duket se ka mbetur një tifoz i Barcelonës, pas aventurës 3 vjeçare te katalanasit, nga viti 2010 deri në vitin 2013.
Ish-sulmuesi spanjoll vazhdon ta ndjekë skuadrën, ndërsa së fundmi ka dhënë edhe një mendim për situatën e klubit.
Villa tha për “AS” se te Barcelona nuk mjafton të jesh i dyti, por gjithmonë synohet fitimi i trofeve. Ai nuk i kurseu superlativat për Lamine Yamal, por shtoi se nuk mund të krahasohet kurrë me Lionel Messin.
“Tani nuk po kalon një moment të mirë, është normale, por Barça mbetet Barça. Është një klub ku nuk mjafton të jesh i dyti, gjithçka varet nga fitoret. Do të luftojë për gjithçka pasi ka futbollistë të nivelit botëror. Është e pamundur të mendosh për një turne dhe të mos e shohësh Barcelonën si një nga ekipet që mund të fitojë trofeun.
Lamine Yamal është djalosh i jashtëzakonshëm. Nuk e njoh personalisht, por kam qenë në stadium disa herë dhe më duket shumë i qetë dhe i përqendruar. Nuk bëhet fjalë për shpërthimin e një lojtari që do të zgjatë vetëm disa muaj. Ka kohë që po tregon vlerat e tij dhe vazhdon të rritet. Është me të vërtetë i aftë dhe çdo herë që e sheh të luajë, përmirësohet. Përveç kësaj, e di se çfarë do të thotë të jesh një kampion.
Krahasim me Messin? Kurrë! Është e vështirë që të krahasosh ndonjë lojtar me Messin sot. Lamine Jamal është që tani një yll botëror. Ka arritur gjëra të rëndësishme në dy vite dhe si tifoz i Barçës, më emocionon. Tifozët kanë të drejtë të ëndërrojnë me të, por nuk mendoj se është e nevojshme ta krahasojmë me Messin”, tha David Villa.
