Për Elvis Rroshin kryebashkiakun e Kavajës i arrestuar për mosdeklarim të dhënash në formularin e vetëdeklarimit, gjykata vendosi sot masën “arrest shtëpie”, ndërsa ajo që i befasoi të gjithë ishte “dashuria” e popullit të Kavajës për të.
Nuk e ekzagjerojmë po të themi që ai është pritur si “hero”, teksa u kthye në shtëpi, ndërsa duket se kavajasit janë të gatshëm të lënë edhe kokën për të.
Një qytetar e quan Mandela e Kavajës, ndërsa një tjetër i uron “vdekjen” të gjithë atyre që iu duan të keqen Ervinit, siç e thërret ajo me një nga 5 emrat e përdorura nga Rroshi në shtete të ndryshme.
“Ai është Mandela e dytë në Kavajë, njëri është në Brazil, ky është në Kavajë”,- tha një qytetar.
“Çfarë keni me kryetarin e bashkisë, çfarë ka qeveria me kryetarin e Bashkisë, pse i ka dhënë Kavajës një lulëzim dhe një mbretëri. I ka ngritur kokën gjithë Kavajës, ne jemi të gjithë me Ervin Rroshin, ne do japim kokën për Ervin Rroshin. Kush ka inot, vdektë! Edhe ato qeveritarët që i bien në qafë, vdektë Sali Berisha”,- tha një tjetër qytetare.
Nuk ka më asnjë dyshim se ku ka arritur koncepti i një heroi në vitin 2016-të në Shqipëri.
Sigurisht, dikush ka të drejtë të respektojë edhe një person që ka gjashtë dënime në Europë. Që i ka hyrë rrugës së krimit në moshë të mitur, është dënuar, dëbuar, burgosur, por përsëri i ka shpëtuar pa u lagur. Megjithatë, njerëzit nuk janë qenie pa memorie, cilido që mendon ta fshijë atë do ta ketë të pamundur, pavarësisht deklaratave të lartpërmendura, fakti nuk zhbëhet. Koha tregoi se krimet dhe e ardhmja nuk blihen me para, sa do të jenë ato. Aq më tepër të blihet koha, kjo e fundit, sado vonon është gjykatësja më e drejtë. Nëse sot dikush ngatërron kriminelin me heroin, kjo nuk është fundi i botës, por është fillimi i fundit të Kavajës. Fati do, se Kavaja nuk është bota dhe as nuk do jetë ndonjëherë…
