Po të gërmosh në listën e pushtetarëve socialistë do të dalin aq shumë “Kajmakë” të tjerë sa nuk do të mjaftonin emrat e bulmetrave të Shqipërisë ka deklaruar me ironi Dashamir Shehi mbi rastin e kryebashkiakut të Vorës.
Për kreun e LZHK, rasti “Kajmaku” është jo thjesht personal por një “projekt politik” i cili po e karakterizon qeverisjen Rama në çdo hallkë.
“Është mendësia e tij, është bindja e tij personale, që batakçiu është më i mirë se i ndershmi, se i forti është më i mirë se i drejti, se i pasuri është më i zoti se i varfëri (se sigurisht sipas Ramës, të varfrit që kanë ngelur të tillë, kanë ngelur nga pazotësia e tyre dhe jo nga padrejtësia e sistemit)” shkruan Shehi.
Shehi akuzon drejtpërdrejtë kryeministrin për gjendjen e vendit, duke mos komentuar mbi rastin konkret të Agim Kajmakut por duke e parë atë si nj shembull i cili ka për origjinë mënyrën e qeverisjes.
“Me këto mendësi dhe praktika, ndërtohen bandat, ndërtohen mafiet, ndërtohen organizatat kriminale. Fatkeqësisht kjo po ndodh në Shqipërinë tonë të vogël” shton kreu i LZHK.
Në fund të reagimit të tij Dashamir Shehi thekson se denoncimi i këtyre rasteve nuk mjafton për përmirësimin e situatës por se kjo e fundit mund të fillojë vetëm me rrëzimin e “sistemit të Ramës”. /Opinion.al
