Departamenti amerikan i Shtetit ka mbështetur aksionin policor të Shqipërisë, të zhvilluar ditën e djeshme në kampin e Manzës në Durrës, ku janë të strehuar rreth 3.000 pjesëtarë të opozitës iraniane.
Një zëdhënës i DASH është shprehur se Shqipëria ka të drejtë të hetojë çdo veprimtari të mundshme të paligjshme brenda territorit të saj.
“Policia Shqiptare na ka siguruar se të gjitha veprimet janë kryer në përputhje me ligjin. Ne mbështesim të drejtën e Shqipërisë për të hetuar çdo veprimtari të mundshme që është e paligjshme brenda territorit të saj. SHBA nuk e sheh MEK-un si një lëvizje të qëndrueshme demokratike që përfaqëson popullin iranian. Departamenti i Shtetit ka shqetësime serioze për organizatën e MEK, përfshirë edhe akuzat për abuzime të kryera kundër anëtarëve të saj. Qeveria e SHBA nuk ofron asnjë trajnim ose mbështetje për MEK, nuk kontribuon me fonde dhe nuk mban kontakte thelbësore përveç çështjeve që kanë të bëjnë me zhvendosjen e MEK, gjë e cila është përfunduar në vitin 2016”, thuhet në reagimin e një zëdhënësi të DASH.
Me urdhër të SPAK dhe GJKKO, të martën forca të shumta policore mësynë në kampin “Ashraf 3” të muxhahedinëve në Manzë për të kryer kontrolle. Policia sekuestroi kompjutera dhe servera për të cilat ka dyshime të forta se janë përdorur për të kryer sulme kibernetike.
Kontrollet e policisë çuan në përplasje të ashpra mes policisë dhe anëtarëve të opozitës iraniane.
Muxhahedinët pretenduan se një person i komunitetit të tyre u vra, por Policia e Shtetit i hodhi poshtë këto pretendime duke thënë se personi në fjalë kishte humbur jetën si pasojë e një ataku kardiak.
Drejtori i Përgjithshëm i Policisë së Shtetit, Muhamet Rrumbullaku, ka konfirmuar se gjatë këtij aksioni ishin lënduar 15 zyrtarë policorë dhe 21 anëtarë të Organizatës së Muxhahedinëve të Popullit të Iranit (MEK)./Opinion.al
