Christian Danielsson, Drejtori i Përgjithshëm për Politikat Evropiane të Fqinjësisë dhe Zgjerimit, ka zhvilluar mëngjesin e sotëm takimin e parashikuar me kryeministrin Edi Rama. Takimi mes të dyve është zhvilluar në Kryeministri, ndërsa të pranishëm kanë qenë edhe Ministri i Jashtëm Gent Cakaj, Ministrja për Marrëdhëniet me Parlamentin Elisa Spiropali si edhe ambasadori i BE-së në Shqipëri, Luigi Soreca.
Danielsson, nëpërmjet një postimi, ka thënë se ka pasur një bisedë të hapur me kryeministrin Rama. “Një bisedë shumë e hapur me kryeministrin @ediramaal për situatën aktuale politike dhe reformat. Shqipëria duhet të vazhdojë përparimin në të gjitha fushat e reformave, dhe në veçanti luftën kundër krimit dhe korrupsionit, për të na bindur në qershor, kur Shtetet Anëtare të BE do të shqyrtojnë përparimin”, ka shkruar ai.
Në axhendën e Danielsson në Tiranë është edhe takimi me Lulzim Bashën dhe liderët e tjerë të opozitës, ndërsa më pas një konferencë për shtyp./Opinion.al
