LDK dhe LVV ka arritur marrëveshjen për formimin e qeverisë. Ndërkohë mediat në Prishtinë kanë nxjerrë edhe emrat e parë të qeverisë. Sipas raportimeve Glauk Konjufca do të propozohet Ministër i Punëve të Jashtme, ndërsa Vjosa Osmani për kryeparlamentare.
Po teksa një pjesë e mirë e emrave nga Vetëvendosje kanë dalë, interes përbëjnë ministrat nga LDK. Kështu sipas Klan Kosovës, LDK do të ketë këto Ministri: Anton Quni – Ministër i Mbrojtjes; Lumir Abdixhiku – Ministër për Infrastrukturë; Besian Mustafa – Ministër i Bujqësisë; Hykmete Bajrami – Ministre për Arsim; Agim Veliu – Ministër i Brendshëm; Vlora Dumoshi- Ministre për Kulturë, Rini dhe Sport.
Lidhur me këto zhvillime Nënkryetari i parë i LDK-së, Lutfi Haziri ka thënë se ”gjithçka është gati për nesër”. Zgjedhjet e parakohshme parlamentare të 6 tetorit të vitit 2019, të katërtat me radhë që kur Kosova shpalli pavarësinë e saj në shkurt të vitit 2008, pasuan dorëheqjen e ish-kryeministrit Ramush Haradinaj, i cili u thirr në Hagë për t’u marrë në pyetje nga Prokuroria e Posaçme që trajton pretendimet për krime lufte dhe të pasluftës në Kosovë.
Rezultati i zgjedhjeve të 6 tetorit shënoi edhe ndryshimin më të madh në skenën politike pas shpalljes së pavarësisë së Kosovës. Lëvizja Vetëvendosje doli e para e pasuar nga Lidhja Demokratike dhe që të dyja partitë thanë se nuk kanë alternativë tjetër përveç koalicionit ndërmjet tyre. Pas 12 vjetësh në pushtet, Partia Demokratike e Kosovës del në opozitë./Opinion.al
