Tirana është një nga 3 sugjerimet që bën gazeta britanike “Daily Express” për të gjithë ata që duan të bëjnë pushime në Qershor.
Gazetarja Esther Marshall e specializuar në rubrikën e udhëtimeve thekson se janë të shumtë ata që zgjedhin të pushojnë më herët duke zgjedhur Qershorin për udhëtime duke qenë se moti është më i mirë dhe se çmimet janë mjaft më të lira se Korriku dhe Gushti.
Dhe përveç Kopenhagenit në Danimarkë dhe Tuluzës në Francë, “Daily Express” rendit edhe kryeqytetin shqiptar Tiranën. Në shkrim thuhet se në atë kohë as biletat nuk janë të shtrenjta pasi variojnë nga 26 në 58 Paund.
“Shqipëria është destinacioni në mendjen e të gjithëve këtë vit dhe kryeqyteti i vendit është një nga ndalesat më emocionuese në Evropë”, citohet në shkrim duke u sugjeruar lexuesve të vizitojnë muzetë e qytetit për t’u njohur me historinë e vendit ose mund të çlodhen në sheshin Skënderbej.
“Nëse preferoni të vizitoni plazhin, Durrësi, një nga zonat turistike të vendit, është më pak se një orë me makinë nga Tirana”, thuhet ndër të tjera në shkrimin për Shqipërinë.
