TIRANE – Arta Dade, kryetare e Komisionit të Jashtëm dhe një nga eksponentet më të vjetra e më me peshë në PS jep mesazhe të qarta për Qeverinë, duke thënë se disa ministra duhet të ndryshohen. Ajo ka qenë edhe më parë kritike ndaj ministrave Bushati dhe Tahiri, por në emisionin “5 Pyetje nga Babaramo” ajo tha qartë se ky kabinet është i dobët, kur e krahason me Qeverinë Nano.
“Kujtoj qeverisjen tonë 8-vjeçare, por ne si ministra të asaj kohe kishim një ndroje dhe përgatitje kolosale kur dilnim para grupit tonë parlamentar, sepse ishim të detyruar të shpjegonim zbatimin e politikave në secilën ministri që drejtonim, dhe kjo fatkeqësisht nuk bëhet sot”.
Teksa vuri theksin tek analizë që duhet të bëjnë gjithë ministrat, Dado u shpreh se “edhe kur kërkohet shpjegim në grupin parlamentar të PS nga ministrat, Kryeministri del dhe jep shpjegime vetë”.
“Ministrat që janë atakuar më shumë kanë detyrim të vijnë të sqarojnë në grupin parlamentar se si qëndrojnë çështjet. Unë besoj se sesionin tjetër parlamentar duhet ta nisim me këtë. Minimalja duhet të sqarohemi me grupin parlamentar që edhe kur mbrojmë qeverinë tonë të jemi të bindur”. Kështu shprehet Arta Dada për ekzekutivin.
Por çfarë thotë Arta Dade për Partinë Socialiste, duke qenë anëtare e kryesisë së PS për vite. Ajo thotë se strukturat e Partisë Socialiste nuk kanë funksionuar, ndërsa shton se në grupin parlamentar ka persona pa përvojë.
“Nuk mblidhemi sepse kryesinë e mbledh kryetari dhe një numër kolegësh tani janë edhe ministra. Më në fund u mblodh asambleja që kishte dy vjet pa u mbledhur, kështu që ne nuk kemi funksionuar si struktura të partisë. Me idenë që funksion grupi parlamentar, nga njerëz që nuk kanë përvojë e nuk e di a janë të gjithë anëtarë të PS, se ndodh vetëm këtu që je deputet dhe bëhesh anëtar i partisë. Jeta politike fillon që në rini. Për fat të keq kjo nuk ka ndodhur këto vite në PS. Të shpresojmë që ky kongres do të vë themelin e partisë në shinat ligjore se statuti është si kushtetuta dhe duhej zbatuar. Krijimi i strukturave të tjera kanë bërë që kryesia të mos mblidhet. Me individë të emëruar është vështirë të menaxhohen duke u bashkuar dy qarqe, se janë bërë 6 njësi të mëdha nga 12 qarqe dhe nuk funksion çdo strukturë dhe ka dhe arbitraritet në mënyrën se si përzgjidhen njerëzit”.
