Ministri i Brendshëm, Bledi Çuçi, zhvilloi sot një takim me ambasadoren e Delagacionit të BE-së në Tiranë, Christiane Hohmann dhe diplomatët e të gjithë vendeve të tjera të unionit. Përmes një postimi në “Facebook”, Çuçi shkruan se në takim është diskutuar për sfidat në punët e brendëshme.
“Falenderoj ambasadoren e Delagacionit të BE-së në Tiranë, Christiane Hohmann për ftesën, për të marrë pjesë në një bisedë të hapur me ambasadorët e vendeve anëtare të unionit, mbi rezultatet dhe sfidat në fushën e punëve të brendshme teksa rrugëtimi ynë drejt aderimit të plotë ka marrë një ritëm të ri”, shprehet ministri Çuçi.
Në vijim ai thotë se ka ndarë me diplomatët e Bashkimit Europian edhe vizionin për reformimin e Policisë Kriminale.
“Pata mundësinë të diskutoja me ta për çështje që lidhen me Kapitullin 24 në procesin e negociatave me BE-në dhe ndava vizionin tonë për reformimin e Policisë Kriminale, si “kali ynë i betejës” në luftën kundër krimit të organizuar”, thotë Çuçi.
Një çështje tjetër e rëndësishme që është diskutuar është edhe sulmi kibernetik ndaj sistemeve dixhitale të Policisë së Shtetit. Çuçi thotë se i ka kërkuar BE-së mbështetje për forcimin e sigurisë së sistemeve dixhitake të Policisë së Shtetit.
“Shpreha gjithashtu shqetësimin për sulmin kibernetik dhe kërkova mbështetje nga vendet e BE-së për forcimin e sigurisë së sistemeve dixhitale të Policisë së Shtetit. Shqipëria jep një kontribut të qënësishëm në sigurinë e unionit kur vjen puna tek adresimi i sfidave të përbashkëta si flukset migratore të paligjshme; lufta kundër trafikut të drogës; kontrabandimi, trafiku i qenieve njerëzore; pastrimi i parave dhe çdo formë tjetër krimi transnacional”, shprehet ministri Çuçi.
