Ministri i Bujqësisë dhe Zhvillimit Rural, Bledi Çuçi ka paralajmëruar me sanksione të gjithë bizneset që shkelin ligjin në zonat turistike. Ministri ka qenë në një takim në Himarë me Task Forcën për mbarëvajtjen e sezonit turistik në këtë bashki, dhe përveç zbatimit të masave disiplinore me rigorozitet ngriti dhe një problem tjetër.
“Të gjithë ata që kanë dalë nga leja. Nuk ka as paralajmërim fare. I merret leja dhe nuk i jepet më. Ka filluar një fenomen i ri që nuk e kemi pasur më parë. Ngritja e kampingjeve në plazh. Është gjëja që në mënyrë kategorike duhet ndaluar. Për kampingje ka vende të caktuara sepse duhet të ketë disa kushte minimale” u shpreh Çuçi.
Ministri u ndal gjithashtu edhe tek problemi i ndotjes akustike gjatë ditës.
Edhe gjatë ditës duhet bërë një lloj disiplinimi se është ndotje e tmerrshme akustike. Ka norma edhe gjatë ditës se sa duhet të jetë zhurma. Reagimi ndaj telefonatave të qytetarëve duhet të jetë i padiskutueshëm”, u shpreh Ministri i Bujqësisë dhe Zhvillimit Rural.
Bashkë me ministrin Çuçi në këtë takim ishte edhe ministrja e Financave dhe Ekonomisë, Anila Denaj. Ata koordinojnë Task Forcën për sezonin turistik në bashkitë Sarandë dhe Himarë. /Opinion.al
