Virusi Sars Cov-2 i cili shkakton sëmundjen Covid-19 i ka marrë jetën më shumë se 100 mijë personave në të gjithë botën dhe ka infektuar rreth 1.65 milionë sipas të dhënave të Universitetit Jon Hopkins.
Virusi i ri u raportua nga autoritetet Kineze në fund të dhjetorit të vitit të shkuar ndërsa në 11 janar Kina njoftoi vdekjen e saj të parë nga virusi, një burrë 61-vjeçar që kishte blerë ushqime nga tregu i prodhimeve të detit. Zyrtarisht vdekja e tij kishte ndodhur më 9 janar.
Më 30 janar, OBSH shpalli koronavirusin si emergjencë globale pasi numri i vdekjeve në Kinë u rrit në 170, me 7,711 raste të raportuara në vend, ku virusi ishte përhapur në të gjitha 31 provincat. Në fund të javës, Kina raportoi 304 vdekje mes 14.380 të infektuarish.
Brenda disa ditësh, raste të reja u konfirmuan në Indi, Filipine, Rusi, Spanjë, Suedi dhe Mbretërinë e Bashkuar, Australi, Kanada, Gjermani, Japoni, Singapor, SHBA, Emiratet e Bashkuara Arabe dhe Vietnam.
Një muaj pas vdekjes së parë, në gjithë botën kishte rreth 1 mij viktima. Kina kishte 908 vdekje të konfirmuara dhe gjithsej 40.117 infeksione.
Një ditë më vonë, OBSH njoftoi se sëmundja e shkaktuar nga koronavirusi i ri do të quhej “COVID-19”. Koronavirusi i ri vetë u quajt SARS-CoV-2.
Një muaj më vonë numri i viktimave që kishte shkaktuar virusi ishte katër-fishuar, rreth 4 mijë. Një ditë më vonë OBSH e shpalli shpërthimin e koronavirusit një pandemi.
Marsi ishte muaji kur epiqendra e virusit do të zhvendosej në Europë. Italia dhe më pas Spanja u bën vendet më të goditura.
Numri i vdekjeve nga COVID-19 u 25-fishuar nga 10 marsi në 10 prill duke kaluar 100 mijë. Italia regjistron më shumë të vdekur e ndjekur nga SHBA, Spanja dhe Franca.
Tashmë epiqendra e shpërthimit është në Shtetet e Bashkuara ku numërohen rreth gjysëm milioni të infektuar.
Ditët më vdekjeprurëse deri kanë qenë periudha 4-7 prill ku janë regjistruar 17 mijë viktima në gjithë globin.
Rreth gjysma e popullsisë së globit tashmë është nën urdhrat e një izolimi për shkak të pandemisë. Vende të varfra si ato të Afrikës si dhe zona rurale në Indi po regjistrojnë raste të reja ndërsa vala e infektimeve ka detyruar ekonomitë më të mëdha të globit të ndërmarrin masa të paprecedenta ekonomike pasi pasojat e kësaj pandemia pritet të jenë tragjike. /Opinion.al
