Presidenti i zgjedhur i Shteteve të Bashkuara, Joe Biden i ka bërë thirrje Kongresit që të miratojë Projektligjin për ndihmë pas krizës së shkaktuar nga koronavirusi.
Biden është shprehur se aktualisht rimëkëmbja ekonomike është duke u ngadalësuar dhe për këtë arsye duhet sa më parë që të miratohet paketa e dytë e ndihmës për qytetarët dhe bizneset.
“Nëse nuk veprojmë tani, e ardhmja do të jetë shumë e zymtë. Amerikanët kanë nevojë për ndihmë dhe ajo ndihmë iu duhet tani”,-tha Biden.
Pas raportimit më 4 dhjetor për shkallën e papunësisë në muajin nëntor, Biden tha se ai mbështet një paketë ndihme prej 908 miliardë dollarësh për COVID-19 dhe se kjo po shqyrtohet në Kongres.
Ai tha se sapo të marrë detyrën do të kërkojë nga Kongresi që të miratojë më shumë paketa ndihme. Biden dëshiron që demokratët dhe republikanët në Kongres të miratojnë paketa më të mëdha të ndihmës sepse “ata do të përballen me një nevojë të paparë” për këtë gjë, tha ai.
Ky projektligj është projektligji i dytë i ndihmës, pasi paketa e parë u miratua në muajin mars./ Opinion.al
